كغيري من الدراري كنت مولعا بجمع كل انواع البواشن للفوز بالجوائز القيمة
بالساعات تاع بيبسي و البالونات و غيرها من الجوائز الغالية الثمن و ذات
يوم لميت 10 بواشن تاع كوكا و ربحت دراجة هوائية من نوع = بيجو 508= مع
كامل التجهيزات و بينما انا اتجول بدراجتي حتى اسطدم في فيراج بسيارة من
نوع = بي ام دوبل يو= اخر عيطة تركبها فتاة من نوع= مرسيديس ميتاليزي=فائقة
الجمال الشعر اصفر و العين خظرة هبطت
مسرعة و انا اتلوى في الارض بعد ان دارت لي لاشوفي و قالت== اوو مون ديو تو
فا بيان...كنت اتعصر من السطر و لكن ذهب الالم و نهضت و قلت لها== ما
تقلقيش ختي مكان والو كي الحليب بطوش...اردت الذهاب و لكن لم تتركني اخذتني
الى الطبيب الذي وجد انني تكسرت دوبل فراكتور في لاشوفي =تبا انا تقعرت
قاع و طحت للطفلة مكان والو= درت البلاط و خرجت من المستشفى طلبت رقم هاتفي
لكي تطمئن على صحتي يوميا ..و فعلا كانت تعيطلي يوميا و ذات يوم طلبت مني
ان اغير ملابسي فهي اتية لكي تخرجني احوس قليلا معها ...خرجنا معا و توجهنا
الى احد افخم مطاعم العاصمة اين تناولنا وجبة العشاء لا اكذب عليكم
فالدهشة كانت حاكمتني =بالادار= و راسي دار كابريول على وجهي ...بدانا
بالقسرة و هنا =حكمت طريق الشلف بالهدرة= و بدات نتيري برك في كل الاتجاهات
حتى اغرمت بي و طاحت فيا لوفا لوفا ....قالت لي انك رائع ..تبا تبا اتذكر
انني قطرت في سروالي من الخوف و همت بي و هممت بها و خرجنا من المطعم ..و
نحن في الباركينغ جاء مول الباركينغ و طلب 200 دج و بالطبع و لان فتاتي
بهلولة جبدت لتخلصه فقلت لها لا ..لا تخلصي هل جننتي 20ميل ..و خزرت في
حبيبنا و قلت له شريكي نتا مقود من وذنك واش محمد هوبلة راك تشوف فينا ولاد
علي حداد فكروشيت معه و كروشا معي و نفضني بردخة..اههه يا الاستاذ هذا
يدربك بحشة..هنا تذكرت اسرعت مسرعا الى لامار تاع البيام و جبدت باطا جو
رويبة شربتها و منحت القوة لجسمي و انطلقت مسرعا نحوه فدربته بدماغ اتذكر
انه بعدها انه لم يتذكر شئ ...نحيت البلاط و ركبت البيام مسرعا انا و
حبيبتي و لما وصلنا الى مكان امن طلبت انهاء العلاقة لانني==اقغيسيف= بلعطت
و حللت حتى تحليت قاع و في الاخير ذهبت و عدت انا الى المنزل .........و
الان انا في البوشون السابع قريب نربح فيلو