في احد الايام كنت قاعد في الحومة استنشق السخانة التي كانت دايرة لاسياست
مع اولادها و احتسي مشروبي المفضل =تشن تشن= و خطرت في بالي فكرة جهنمية
..رفدت الهاتف و عيطت لموسطاشتي الحبيبة و قلت لها..==الو عمري راكي في
الدار ..فاجابت==ايه وين حبيتني نكون راني نسيق في بيت الما =اعزكم
الله=..تبا لا حنانة لا هم يحزنون تقول بيت بول ..قلت لها.==اسمعي نجوز
عليك نروحو للبحر ..فابتسمت وقالت==اوكي
نكمل نسيق السال دوبان و جوز عليا...طلعت للمنزل ووجدت روحي درت كلش في
الساكودو و هبطت نوظت سيارتي من نوع سيمكا سنة اولى في السير 1974 سخنتها
مليح و عمرتلها 13 الف صون بلون و انطلقت و جزت على حبيبتي التي كانت تقطن
احدى الاحياء الشعبية المملوءة بالمافيا و صحاب الرجلة بضواحي بوبصيلة
سيتي ..رفدتها و انطلقنا للبحر في رحلة استغرقت 3 ساعات بسبب ان سيارتي
سخنت 5 مرات ..وصلنا الى بحر سابل دوغ ..و رشقنا الباراسول و وضعنا
السربيتا ارضا و سطالينا ..ما اعجبني في حبيبتي مسكينة انها حبت طيح خشين
بكل الوسائل بعد ان جبدت خليط جيو كيميائي من زيت سانقو و نيفيا و كوكوني و
هو البغونزاج على الطريقة البوبصيلية ..لعلمكم مدامتي حجوبية و تعوم
بالحجاب و بيجاما ملتحت ..المهم قعدنا نتجاذب اطراف الحديث حتى بدا الزل
يسطالي من كل جهة حيث ان الزل ورائكم و الزل امامكم اين المفر و هنا
مادامتي اصبحت نشوف فيها شغل راجل بسبب الخير لي كان يتلاوح بالاظافة الى
الشعر الذي غزا طوابقها ..فهذا بيكني..و هذا مايو..و هذا..الخ ..في هذه
الاثناء طلعت شريت 2 كاسكروطات فريت اوملات و قرعة حمود و باكي قوفريط و
قهوة .هبطت اكلت حبيبتي حتى خرجت الماكلة من وذنيها للتذكير كلات حسب
روايتها 2 طباسا مسفوف في الدار و قالت لي انها داخلة تعوم ..دخلت و تشبكت
على صدرها مقودة =قلتلكم راجل= و بدات تدرب و راحت للارج و في الروتور في
كيتاني السباحة مسموحة ..جاها صعيب الروتور و بدات ارها ديرابي شيئا فشيئا
حتى فرينات ساك و رقد الموتور ..و هنا تشبكت و ديماريت على زهري المعوج
.لما وصلت انا نجبد و حيجابها يجبد يا الزح حتى نحيتهولها على سواد السعد و
خرجتها الى الشاطئ بعد ان شربت كميات معتبرة من المياه المختلط بالبول و
الحشيش ..و فجاة توقف قلبها عن النبض بسبب حبات طعام بوشاو العرق الايسر
تاع قلبها و درت فمي في فمها==لا حياء في الدين= لكي نديرلها لا
غيسبغاسيون بوش ابوش ..و انا اتنفس حتى قست لي موسطاش و خرج الشعر من كل
فمها ..و مع الحجاب لي كان منحي ..ما نحكيلكمش الشعر تقول راك مع اخينا
سبحان الله ..عادت الى الحياة بعد ان صارعت الموت و انا صارعت شلاغمها
..عدنا الى المنزل بعد ان شريتلها حجاب جديد و زوج كورنيات لاكريم كريبوني
..دخلت الى حومتي للمساء و انا امشي حتى اسمع وليد حومتي يضبح..= ياو الناس
العايشة قالولي كنت مع زلة اليوم في زرالدة ياااه=...فتاكدت انه شاف
الموسطاشة التي كانت مرمية في الرمل و انا نسلك فيها فتبل للتبهديلة