ذات يوم و انا اتجول فالدلالة تاع لعقيبة = موجودة ببلدية محمد بلوزداد
بالعاصمة لمن لا يعرفها = اذا بي اجد ايرماكس ، خزرت فيها دروات قوش ضربتها
بسكانير كباقي عشاق الحر و ما اكثرهم في الجزائر بديت نيقوصيي معاه فقال
لي " اسمع وليد خالتي و الله غير حنونة ..علابالي السبع يخاف تاقريسيه كي
يشوفك لابسها " في بادئ الامر شكيت بانه بلاعطي معترف به من طرف الهيئة
الكولومبية لبيع الكوكايين المغشوش ...و
لكن بعد اخذ و رد اكتشفت انه من ضحايا ريح رجلة آخر الزمان . المهم ما
نطولش قتلو علاش الرجلة فالايرماكس فرد مستهزئا : "يا صديقي قالي تعرفو عمر
تنفيسة" و هو احد زعماء الهيئة الوطنية لركوب أمواج الرجلة المغشوشة فقلت
نعم فقال : "كان حاب يديها مي جاتو كبيرة" فزاد استغرابي هل سومتها تزيد
كي حب يلبسها المدعو عمر تنفيسة ؟ فبدأت افكر في حيلة من الحيل التي تخرجني
من واقعي المرير و المزري ...المهم نرجع للحكاية تركت امر البلاعطي هذاك و
بدأت افكر بما ان الرجلة في نظر الشباب اصبحة تقتبس من عند عمر تنفيسة
المدعو ايضا شقيف لانه مافيا لماذا لا ادخل عالم تجارة الرجلة و
مستلزماتها؟؟؟؟؟ =حسب تفكيرهم طبعا= ..المهم رفدت هاتفي من نوع نوكيا 1100 و
رحت فالحومة نقلب على النيميرو تاع عمر تنفيسة فاتصلت به و فتحنا حانوت
لبيع الرجلة و مستلزماتها و درنا دراهم عجب و انا اعيش في نعمة و الحمد لله
...و لكن في الاخير بودي ان اقول ان الرجلة ليست فلايرماكس و لاكوسطا و
السيرجيو طاكيني و البالكون تاع الشمه اللي ديرو في وجهك او الشيرة اللي
تعمر بيها راسك و انما الرجلة هي دارك لي تبنيلك دارك اخي العزيز مع تحيات
اخوكم الزوالي صاحب محل " تنفيسة لبيع الرجلة و مستلزماتها "