حرب تروادا

 

في قديم الزمان =نتوما كنتو مزال ما زدتوش= كانت تروادا مملكة تسيل لعاب الكبار بسبب البيترول و الغاز لي فيها..و ذات يوم قرر ملك الاغريق =سليمانوس الثاني= ان يغزو هذه المملكة و بما اني كنت قائد في جيشه فقد كلفني انا بالمهمة رفقة =اشيل= اللي تورنا دوره براد بيت في فيلم حرب تروادا....في صباح الخميس انطلقنا الى تروادا عبر اسطول تاع الفلايك و كنت في الفلوكة انا و اشيل و حميدو و ارزقي تاع عزازقة نتجاذب اطراف الحديث و لما قريب نوصلو راينا جيشهم هناك موجد كلش و بدات الحرب حيث بداو يتيريو علينا بالفلايش و لي بلوك و اتذكر ان حميدو فجخوه و قد استلزم خياطته 13 غرزة في مستشفى بني مسوس ...هبطت من الفلوكة و انطلقت انا و اشيل الى اليابسة و بدانا نستفو فيهم كي الذبان ندرب بالسيف واحد نطيح 13 ..واصنا هكذا حتى صونا هاتفي النقال و كانت مادامتي ==بونجوغ مون بيبي سافا..فقلت لها== وي عمري واش كاين..فقالت ==شيغي راني رايحة مع ماما للسونطغ كوماغسيال تاع بابز اوكي ...فقلت =خلاص روحي نريقلي افار لعشية نعيطلك..في هذه الاثناء رايت احد من العدو راح يقتل اشيل و هنا عينت عليه مليح و تيريت عليه بالبورطابل الذي اصابه اصابة جد بليغة في الراس استلزمت جراحة معقدة على الدماغ بسبب ان هاتفي النقال من الحجم الكبير ...المهم كانت الامور متشربكة جنرال و الطايح كثر من النايض اشيل و انا طلعنا واحد الجبل و دخلنا الكهف و هناك تلاقينا مع الامير فقلنا له =سلم روحك ولا رانا نديرو بيكم تويزة ..الامير عطاها بسبب انو يعرف الزنايق و انتهت المعركة الاولى...نصبنا القياطن طرف البحر و في الليل بقينا ندومنو انا و اشيل و ارزقي في ثلاثة و اتذكر ان اشيل حفر حتى كره و قعد غير يخسر..في الصباح تنقلنا الى المدينة من اجل غزوها و هنا وصلنا الى القلعة بالطبع انا و اشيل فقط و الجيش قعد ينتطر و قفت انا و اشيل امام القلعة و بدات اصرخ==ياااااو يااااو القلعة انتم فيها و نحن الجيش ورائكم سلمو انفسكم او فو بايغا شاغ ..لينطق اشيل و يقول لي== اسمع ما يهبطوش فروشة واش قلت نديرولهم غير انا و انت زدمة...فرديت عليه== واش اشيل عمبالك قلادياتوغ انا واش راك تشوف فيا رومبو ايا صلي على النبي خلينا يرحم باباك وقيل حسبتلك صح ...بداء اشيل يرجل و طايح ما يخافش و في هذه الاثناء ..فتحت ابواب القلعة و خرج منها اكثر من 20 بيت بول و حوالي 30 بارجي اغريقي == وليس الموند= و 12 دوبر مان بدون احتساب لي باطار و هنا ..ههه احكم يا نمر اتذكر ان الطالون تاعي كان يقيس في راسي بسبب السرعة الكبيرة التي هربت بها و لما وصلنا للجيش اتذكر ان الجيش اختفى و طلعو قاع في الفلايك ..كان الامر رهيبا طلعت انا و اشيل في الفلوكة و رحنا دوقة دوقة و لم نستطع غزو تروادا ...بعد ذلك بقرون رايت ما حصل لي كفيلم و رايت اشيل بطل ههه شبعت ضحك لانهم كذبو على الراي العام ..لم اتورني انا في الفيلم بسبب الكاشي حيث تم عرض مبلغ مالي زهيد و سيارة من نوع رونو سيمبول و هذا ما رفضته بالاظافة الى السيناريو المعمر بالخرطي و اخذ براد بيت السوكسي على ظهري.